捷克「逆境求存」的代言
2012/09/08文:江忠德 
 

踢波同做人一樣，最緊要有豪情，人生先會有希望，就好似捷克喺歐國盃8強止步，即刻將目標鎖定2014世界盃外圍賽，鬥志可嘉，隨時會有驚喜o架！

歐國盃8強出局即場檢討
依家啲球員踢到氣咳冇得抖，但食得鹹魚抵得渴，最重要係樂觀啲，負能量都可以變正能量。仲記得捷克喺歐國盃坐過山車，確係逆境求存嘅代言人。當時落筆打三更嘅佢哋首戰被俄羅斯大炒，但佢哋並無氣餒，連贏希臘同波蘭出線入8強，最後僅負葡萄牙出局，算係咁。

最難得係捷克球員喺輸波後嗰兩個鐘頭，先至由更衣室行出嚟接受訪問，好多人以為佢哋閂埋門嘈到拆天，點知原來係開會檢討，為世盃鋪路，退出國家隊嘅老將仲勉勵班新仔，將失敗嘅怨氣變成動力，夠晒勵志。