營業額創新高戰意旺盛 蜜蜂遜得過
2012/09/15文:走肖
創會103年以來最搵錢，多蒙特今晚喺德甲主場對利華古遜，肯定會搏命氹電視台、贊助商同球迷開心，加上射手羅拔利雲度夫斯基跳槽唔成功，自爆話有興趣過檔拜仁，戰意加殺氣要捧2倍「讓球主勝」！

爭冧莊氹電視台高價續約
上季歷史性成為德甲、德國盃雙料冠軍嘅多蒙特，日前開記招公布，上個財政年度營業額係創會以來最高嘅2.15億歐元，按年增加42.1%，稅前利潤高達3,950萬歐元，當中電視轉播、廣告贊助同門票收入升得最勁，由於多蒙特出年要再傾電視轉播合約，呢個時候更加唔可以失威。

由於今季轉會市場出奇淡靜，連兩屆歐霸盃神射手法卡奧都冇人出手搶，嫌人工奀嘅羅拔利雲度夫斯基，當然唔想長踎多蒙特，當有記者問佢假如拜仁開價斟佢有咩反應，羅拔仔竟然半秒都唔諗就回應「好難拒絕」，如果佢一心想要高薪，1月轉會市場重開前要入多幾球至得。

利華古遜冇錢買人實力減
或者大家會驚，多蒙特跟手要喺歐聯對阿積士，今場可能就住踢，但其實新加盟嘅馬高列奧斯同馬里奧葛斯仲爭緊位踢，射手羅拔利雲度夫斯基又暗示想去拜仁，鬥心肯定有。