祖記受讓好「路」
2012/09/19文:阿占
上屆歐聯盟主車路士今晚踏上衞冕征途，E組分組賽第一擊迎戰意甲冠軍祖雲達斯。論實力，呢兩代歐聯王者不相伯仲，意大利籍領隊迪馬堤奧想「揸車」開W確係唔易，事關祖記盡得「意式防守」嘅精髓，上季喺意甲全季不敗封王就係最好證明，今場波祖記受讓，梗係撐1.8倍「讓球客勝」啦！

車仔冇衝撞型球員開路
迪馬堤奧今晚帶領車路士出戰歐聯，肯定感慨良多。事關車仔上季季中炒咗保亞斯，就搵迪馬堤奧做替工，雖然英超得第6，但迪帥就幫「藍戰士」喺歐聯創造奇迹，捧走老細夢寐以求嘅大耳盃，今屆以衞冕冠軍身份出擊，依家仲坐正埋添，所以歐聯對迪馬堤奧嚟講，真係意義重大o架！

但坦白講，車路士今屆要重演歷史難度極高，杜奧巴離隊、「林伯」同A高走下坡，依家嘅車仔已經冇晒傳統英式嘅暴力踢法，靠一班技術型中場扭來扭去，一旦冇人開路又或者面對防守力強嘅勁旅，入唔到波之餘，條防線仲分分鐘出事添！

祖記防線係國家隊骨幹
對家祖雲達斯正正就係可以克制車路士嘅班霸喇！「斑馬軍」係上一世紀嘅歐聯王者，96年攞冠軍，97、98同03年分別殺入決賽，經驗絕對唔差得過車仔。好，唔講歷史，淨係計上季，祖記喺意甲以不敗姿態封王，靠嘅就係一條超強防線：保方、邦路斯、巴沙利、派路加馬治斯奧！呢幾位仁兄同聲同氣，係意大利國家隊同祖記嘅骨幹，有佢哋坐鎮中後場，難怪上季祖記喺19場聯賽客戰，竟然只係失咗8球啦！

除咗防守穩，鋒線嘅胡仙歷亦係祖記搶分嘅Keyman，呢位黑山前鋒上仗鬥熱拿亞被看守教頭卡利拉雪藏打後備，不過「仙哥」一落場，就即刻入波幫「老婦人」反勝對手，今晚胡仙歷解凍，肯定會搏命「反擊」尋日公開寸佢嘅卡帥，咁搞法，祖記分分鐘贏埋車仔都唔奇o架！

歐聯E組

頂占筍盤：祖雲達斯

車仔分組賽例首名
‧祖雲達斯19次作客英格蘭球隊，當中只得2勝。

‧兩軍曾於09年歐聯16強碰頭，當時車仔主場小勝1:0、作客2:2和祖記。

‧車路士近9屆歐聯分組賽，其中7屆係首名晉級，其餘2屆位列次名。