掛住國家打吡 巴塞Hea踢愚賓
2012/10/02文:阿占
「地上最強」巴塞隆拿今晚喺歐聯分組賽G組作客葡超賓菲加。巴塞上輪對莫斯科斯巴達贏得驚險，嚟緊西甲又有場對皇馬嘅「國家打吡」，唔少球迷都對佢哋戰意有保留。不過阿占就認為巴塞喺歐聯浸淫多年，已經去到收放自如嘅地步，有能力以最「慳力」嘅Hea踢方式贏波，攻勢未必水銀瀉地，但客W絕對穩陣。

艾簡達拿養傷兩個月
巴塞上屆歐聯分組賽同AC米蘭同組，照樣以5勝1和不敗成績出線，咪話阿占見高就拜，巴塞呢隊波已經去到爐火純青嘅境界，韋拿、法比加斯呢啲球星都唔係必然正選，新人如基斯甸泰路獲派上陣一樣踢到成個天王球星咁款，佢哋要贏波就好似撳個掣咁容易。

雖然碧基有傷，佩奧爾、恩尼斯達同艾迪安奴都復操隨軍或者踢得，但係堤亞高艾簡達拿打咗柴要抖兩個月，仲要有場西甲國家打吡跟尾，真係大把數要計，不過咁樣巴塞反而會打醒十二分精神。

賓菲加賣走主力死晒火
賓菲加近年培育出唔少球星，不過今季轉會窗完結前連續放走查維加西亞同韋素兩大防守中場，對隊波戰鬥力影響好大，除咗防守差勁之外，連帶進攻火力都受影響，分組賽首仗同些路迪悶和0:0就見到球隊創造力不足，依家嘅實力難以同巴塞抗衡，想唔畀「地上最強」愚弄難過登天。

歐聯G組

頂占筍盤：巴塞隆拿
有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周二晚10:30至11:30

賓菲加20年未贏過巴塞
‧巴塞最近5連勝。

‧賓菲加近8場不敗。

‧賓菲加近廿年未贏過巴塞。

博賓菲加偷雞先入波
賓菲加最近8場不敗，雖然唔及得上巴塞嘅8連勝，但今晚有主場之利，氣勢絕對唔輸蝕。對上8場，賓菲加唯獨上周末作客費利拿半場被打破金身，其餘7場半場都未失過波，今晚對住廿年未贏過嘅巴塞，相信都係以穩守突擊戰術應戰，既然「地上最強」今晚可能要搵兩個防中客串打中堅，隨時畀主隊偷雞成功，不妨冷敲2.95倍賓菲加先入球。