曼城同多蒙特喺歐聯死亡D組繼續廝殺！英超冠軍曼城今晚喺主場迎戰德甲班霸多蒙特，兩支聯賽冠軍新季嘅表現，似乎都唔及上季，尤其係多蒙特「跌幅」就更加明顯，以佢哋條豆腐防線，面對有4大前鋒壓陣、出邊個都得嘅曼城，似乎難逃一敗喇，捧1.8倍主勝啦！

曼城開季至今表現真係唔多得上盤客歡心，條防線患得患失成日落後，要靠「4大神箭」輪流上陣補鑊，搞到主帥文仙尼經常要將451陣式變為4222又或者433，好彩嘅係曼城質素幾乎冠絕全球，鑊鑊都畀佢哋得逞反勝，不過咁真係唔係辦法，據聞文帥早兩日已開會省到班守將「立立令」，今鋪高柏尼等中堅係時候做番齣好戲喇。

講真，文仙尼上季係幫曼城捧走英超冠軍，不過中東老細使咁多錢，終極目標都係歐聯冠軍獎盃，最弊係曼城喺死亡D組首戰臨尾香輸畀皇馬，今場再失分的話，文帥個位真係危危乎o架！講真，曼城主場不嬲都惡到爆，而且阿古路、泰維斯、巴洛迪利同迪斯高都有超強入球能力，阿占估計，由於多蒙特一對中堅轉身較慢，今場文帥應該會用泰維斯拍阿古路打正選，務求用速度腳法撕破「蜜蜂防線」，若然「出事」，亦可以放埋「巴神」同迪斯高踢高空轟炸，點變都應該入到波。

相比起曼城，多蒙特今季跌Watt得仲離譜，當中條防線更加係重災區，中堅蘇保迪沉淪，唔少失球都關佢事，今鋪又點睇得住「阿根廷孖寶」吖！再講，「蜜蜂兵團」近兩場作客被對手攻入6球，聯賽3次作客都未贏過，咁嘅狀態造訪曼城，想輸少粒都難咯！咪忘記多蒙特上屆作客英超嘅阿仙奴都係輸波收場，馬里奧葛斯足踝又有傷，今鋪怕且凶多吉少咯。

歐聯D組

‧連各項盃賽在內，曼城近10仗主場未輸過。

‧多蒙特近3場德甲作客不勝，共失７球。

‧曼城主場4戰德國球隊取得3勝1和，成績可人。

多蒙特今仗作客，好大機會會屯重兵喺防線，至於曼城，係人都知文仙尼一踢歐洲賽肯定踢穩守突擊，雖然呢兩班波喺德甲同英超成日開大，但今晚嚟到歐聯戰場係另一回事，入球細有2.02倍值博。