今晚歐霸盃A組，英超勁旅利物浦將坐鎮晏菲路球場迎戰意大利球隊烏甸尼斯，呢邊廂紅軍喺領隊羅渣士嘅改革下漸見起色，嗰邊嘅烏甸就有靈魂人物迪拿達利同教練古度連吵大鑊，雖然已經解凍復操，但會唔會上陣仲係未知數，紅軍就算出副選，要小勝應該冇難度，一於冷敲3.4倍「讓和」。

講到烏甸尼斯，近日最熱門嘅話題當然係迪拿達利被雪事件啦！呢位隊長喺上場對熱拿亞嘅意甲賽事無故遭棄用，連後備都冇份，教練古度連就自爆係因為雙方喺更衣室內發生爭執，所以至決定雪一雪佢，但就話已經坐低傾過，冰釋咗前嫌喇喎！雖然迪拿達利已經復操，但以烏甸尼斯過往慣於以副選應付歐霸盃嘅情況嚟睇，佢會唔會落場仍然係未知之數，冇咗呢位老將嘅話，紅軍就會少一個心腹大患。

紅軍周日喺英超要硬食史篤城，今場歐霸盃自然會留力，繼續用副選應戰，但小妹相信班小將憑住戰意加上主場威力，已經足夠搞掂烏甸尼斯。利物浦領隊羅渣士見轉會窗買唔到人，就大膽起用一班青訓小將，點知成績同場上表現即刻大躍進，球迷不知睇得幾高興！啲青年軍見到史達寧、蘇索等上位成功嘅例子，仲唔搏盡爭表現咩？

例如過去多次埋怨冇上陣機會嘅進攻中場丹尼爾柏查高，心態都漸見成熟，場上表現亦愈嚟愈好，拍住佐敦軒達臣、舒維爾呢班後生但經驗豐富嘅球員，要爭取入球唔係難事，而且羅帥眼光的確唔錯，新收購嘅翼鋒艾薩迪速度同腳法兼備，德國年輕射手耶斯爾對年青人場處子戰仲爭啲開齋，對住開季9戰僅得1勝兼連續2場食白果嘅烏甸尼斯，實搞得掂啦！

‧利物浦近6場歐洲賽全部不敗，23次喺歐洲賽對意大利球隊得8勝5和10負。

‧烏甸尼斯開季至今9場賽事僅得1勝，當中得2場入多過1球。

‧烏甸尼斯近4場歐洲賽不敗，但最近3場都係1:1打和。

利物浦近期把握力明顯大幅提升，最近4場夾埋入咗13球而且全部開大，但由於蘇亞雷斯、紐尼沙軒等主力得分手未必上陣，加上烏甸尼斯有啞火之勢，捧1.85倍嘅入球細比較穩陣。

歐霸盃A組