曼城周中喺主場踢和多蒙特，雖然未至於宣判佢哋喺歐聯嘅死刑，但前景唔明朗，球員心掛掛，對住擅於死守搶分嘅新特蘭，「藍月亮」隨時又會陷於苦戰。

以曼城嘅實力，其實應該由佢哋控制比賽節奏帶住對手嚟踢，但好多時就掉番轉頭，往往要喺劣勢中反敗為勝或者追和，呢點同球員凝聚力一般好有關係，好似對住多蒙特踢到散兵游勇咁，如果唔係門將赫特屢救險球，「藍月亮」輸埋都似！

曼城近6場波只贏得1場，最閉翳係合共失咗11球，前中後三線連繫唔夠，搞到就算喺主場出擊亦冇晒計仔，以文仙尼嘅保守性格，今仗肯定唔敢輕舉妄動，穩陣攞3分緊要過大炒新特蘭，況且「黑貓」亦唔係善男信女，喺奧尼爾帶領下愈踢愈有信心，之前悶和阿仙奴同利物浦已經有辦睇，今晚話唔定又繼續做和波專家！