澳職第2輪今午上演超重量級大戰，由FC悉尼主場火併紐卡素噴射機，由於兩隊分別有名將迪比亞路同希斯基孭飛，預計超過35,000人入座打破澳職常規賽紀錄。不過呢場星級對決主隊似乎玩唔過，事關悉尼前線靠晒迪比亞路根本撐唔住，要讓波出擊，都係玩「讓球客勝」好過。

被視為A-League史上最高卡士外援嘅迪比亞路，論聲勢真係無人能及，據聞當地電視台今仗仲安排一個貼身鏡頭「Hero-cam」全場追蹤佢嘅一舉一動，滿足Fans。不過打波唔係齋講名氣，FC悉尼上輪作客威靈頓鳳凰淨吞2蛋，呢位前意大利金童全場孤立無援，連射門都冇乜。主帥卡路克雖然話今仗會變陣出擊，但無論用到伊拉克快翼艾希爾菲定土炮保羅列特頂替腦震盪缺陣嘅中場安東尼斯，睇怕都幫唔到幾多。何況佢哋前線仲有耶路尤要代表巴拿馬踢世盃外圍賽缺陣，火力根本信唔過，仲點贏波？

冇錯，噴射機首輪都係輸波收場，表現同樣令人失望。佢哋今仗仲有正選門將比列基迪停賽，要由後備賓堅尼地把關。但講到底，噴射機踢法一向直接簡單，射手希斯基經過上仗落場踢咗70分鐘，已經同隊友慢慢培養到默契，有佢喺前線衝撞滾吓滾吓，悉尼都幾頭痕。