澳職賽季比一般主流聯賽短，10月先開咧，4月就收鑼，又冇Season Break，所以筆者完全唔理解喺世盃外圍賽踢得如火如荼之際，點解仲要編排聯賽，結果搞到本周多支澳職球隊唔齊腳，威靈頓鳳凰更係重災區，今午遠征墨爾本雄心都係凶多吉少。

由於大多澳洲國腳都唔喺本土搵食，故一般澳職隊伍頂多係少一、兩件主將，但一海之隔嘅鳳凰就大鑊得多，事關佢哋同新西蘭國家隊係一脈相連，今戰唔單止缺少6件新西蘭國腳，連兼任國家隊主帥歷奇靴拔都走埋，今仗只能遙控領軍，加埋件射手圖圖利都要代表所羅門群島出戰，唔齊腳下焗住要頂硬上。

至於雄心新季表現對辦，首戰喺「墨爾本打吡」擊退勝利，今仗亦冇球員要去踢太公波，建議今場直取2.4倍「讓主」。

馬膽推介：8場(3)喜惑

開鑼個多月已出賽4次，認真夠勤力，可惜次次都係近而無威脅，但今次快馬唔多，再換上何澤堯減磅出擊，早段順放有權偷雞。