最近復甦嘅唔淨只卡卡，仲有佢個巴西同胞朗拿甸奴，呢位過氣球王上個禮拜日先至大演帽子戲法，話畀大家 佢仲有料到。「細哨」啱啱周中坐完波監谷埋成肚火，今晚復出鬥利斯菲體育會正正係出氣好時間，1.76倍「讓主」係信心之選。

上個月尾明尼路同甘美奧互交白卷，朗拿甸奴喺呢場波侵犯對方前鋒基拔，結果畀體育仲裁法庭秋後算帳，被罰上場聯賽鬥國際體育會要坐波監，最終明尼路淨吞3蛋錄得今季聯賽最大敗仗，兼且被「一哥」富明尼斯拋甩9分。向來Nice爆嘅「細哨」前日出席操練時黑口黑面拒絕受訪，事後佢透過twitter話幫唔到球隊手好失望，咁有Heart，今晚刑滿復出仲唔搵利斯菲體育會祭旗咩？

大家有印象嘅話，應該記得喺08年，菲臘布朗曾經喺半場時間罰侯城球員留喺球場訓話，估唔到利斯菲體育會新帥沙治奧古迪斯都有樣學樣，上仗首度領軍大敗畀甘美奧1:3之後，企正喺球場中圈炮轟班手足，賽後仲向記者批評班球員態度有問題，搞到士氣鬼咁低落，以佢哋連續9場巴甲作客都失分嘅頹勢嚟睇，造訪明尼路隨時輸鑊勁。