南韓誓擒伊朗破宿命
2012/10/16文:走肖
信「主」真係得救？世盃外圍賽亞洲區「10強賽」A組大戰爆發，伊朗今晚喺主場對南韓，平手都冇着數。雖然南韓從未試過作客砌低伊朗，但教頭崔康熙為咗打破宿命，連愛將李東國同李正秀都唔選，朴主永重新得到重用隨時大爆發！

體力戰棄用李東國 李正秀
現時南韓以7分位列榜首，伊朗得4分主場肯定搏，不過論鬥心，南韓絕對唔會輸蝕，曾經帶領全北汽車稱霸亞冠盃嘅教頭崔康熙賽前向傳媒解釋，由於預咗呢場對手會由頭搏到尾，所以冇選年紀較大嘅射手李東國同中堅李正秀，反而考慮重用「獨立鬥士」朴鐘佑呢啲硬漢，希望用體力拚勁搶W。

其實崔康熙上任以來，李東國同李正秀都係佢心目中必然正選，呢場忍痛變陣，證明佢話要全取3分，打破作客伊朗不勝宿命唔係講吓就算，即使後衞朴源載同黃錫鎬上星期因傷退隊都唔需要擔心，畢竟佢哋都唔算係防線核心成員。