拜仁德國兵火滾炒「塞」
2012/10/20文:查理阿蛋
以拜仁兵為核心嘅德國隊喺世盃外圍賽被瑞典恥辱性迫和，當然冇癮啦，不過拜仁慕尼黑今晚喺德甲作客杜塞爾多夫，就有力炒起呢支升班球隊出番啖氣，杜軍嘅主場不敗身極有可能被破，一於捧1.73倍「讓客」啦！

杜塞爾多夫防線跌Watt
拜仁認真好彩，喺今次國際賽期得玻璃人洛賓受傷，列貝利同其他主力都冇病冇痛咁歸隊，陣容基本上唔需要作咩調整。而且湯馬士梅拿、舒韋恩史迪加等德國國腳喺世盃外被瑞典連追4球和波，梗係成肚冤屈氣啦！返到德甲地頭實行拎杜塞爾多夫當沙包咁踢嚟洩憤，加埋喺國際賽繼續有波入嘅文迪蘇傑，要炒近況回落嘅杜軍並唔難。

無可否認，杜塞爾多夫作為升班球隊，可以喺頭5場德甲保持不敗兼唔失波算係交足功課。不過佢哋喺主場話就話不敗，其實3場都只係勉強和波，近2場聯賽夾埋更失咗3球，防線明顯冇季初咁穩陣，何況今場主力中堅馬尼沙斯又有傷唔出得，對住德甲火力最強嘅拜仁，都係難逃被炒命