清武博跳槽撐起紐倫堡
2012/10/21文:走肖
紐倫堡今晚喺德甲主場對奧格斯堡，係時候踢爭氣波開主W翻身。近年德甲「瀛」氣逼人，最新消息話紐倫堡嘅清武弘嗣被多蒙特睇中，打算搶佢番去頂替香川真司嘅位置，試問清武弘嗣呢場有咩理由唔搏？1.82倍主勝值得支持！

清武世盃外擔正 多蒙特嗒糖
由於岡崎慎司受傷，清武弘嗣喺剛啱嘅世盃外圍賽，坐正為日本國家隊打正選，明眼人都睇得出，佢先係日本教頭沙哲朗尼心目中進軍2014年世盃決賽周嘅骨幹，加埋清武同香川真司一樣出身自大阪櫻花，多蒙特睇見自然流晒口水。同時，據講紐倫堡又諗住收購櫻花新星扇原貴宏，為賣走清武弘嗣做足準備，證明呢單嘢唔係吹水，清武弘嗣當然要搏命騷「哥利」。

奧格斯堡今季作客入得1粒
另方面，奧格斯堡開季前有借用嘅日本中場細貝萌離隊，南韓國腳具滋哲又未好番，導致今場上演唔到亞洲打吡，但無論如何，今季奧格斯堡聯賽作客3場得1個入球，面對史浩克04同緬恩斯先後以兩球差距慘敗，話晒清武弘嗣加盟紐倫堡以來，經已有1個入球加4次助攻，完全冇怯場，今場要證明身價，應該會加多兩錢肉緊為紐倫堡擺脫4連敗頹勢，信佢不妨吼實主W。