西維爾畀巴塞打到洩氣
2012/10/22文:李榮基

今晚西甲上演戲碼十足嘅獨腳戲─西維爾主場對馬略卡。西維爾進入後簡路迪同法比安奴時代，由尼格度擔起前線大旗，配合杜查奧斯基同捷西斯拿華斯兩翼側擊，今季主場打出不俗氣勢，連皇馬都贏到，可惜一周前主場喺一片爭議聲之中輸咗俾巴塞隆拿後，成隊波洩晒氣，結果上星期作客再負切爾達。原本今仗重返主場，理應寄予厚望，但杜查奧斯基因傷缺陣，仲有加利美度停賽，中場優勢並不明顯。

馬略卡添猛將
對手馬略卡亦有荷西祖紐尼斯、安東尼奧盧比斯、查維馬基斯要養傷，另外祖奧域陀又因重創收咧，幸好卡柏路斯眼明手快同巴塞借入中堅方達斯填補，甚至連養傷多時嘅墨西哥球星杜斯山度士亦都有機會重披戰袍。今場係兩支陣容唔完整嘅球隊對碰，雙方同樣兩連敗，而且同得11分，西維爾實力應稍高，不過馬略卡表現亦頗有韌力，縱然作客亦可保不敗。