馬略卡發維 兩件「巴塞正貨」打爭氣波
2012/10/22文:亨格比利 
 

聯賽兩連敗嘅馬略卡今晚西甲將會造訪西維爾，呢支小島球隊剛啱借入中堅方達斯，養傷多時嘅杜斯山度士亦會粉墨登場，兩件「巴塞製造」屈埋屈埋當然想做番齣好戲，對住西維爾呢隊大蠱惑正正係攞威良機，2.5倍「讓客」博得過。

巴塞鬧緊中堅荒都仲要將方達斯外借畀馬略卡，即係當呢位後生仔透明啫？方達斯為證明實力點可以衰？同屬巴塞青訓產品嘅杜斯山度士，自從離開巴塞之後都未威過，呢位墨西哥前鋒今季終於唔使過住外借嘅漂泊生活，正式同馬略卡簽約4年，最近仲克服埋腿筋傷患添，兩件「巴塞製造」今晚齊齊為馬略卡首度披甲，為面子同啖氣肯定大打爭氣波。

西維爾表現飄忽
對家西維爾牌面係秤先，但呢班蠱惑波冇厘正氣，試過贏皇馬同僅負巴塞，大家睇好佢嗰陣又可以淨吞切爾達兩蛋，飄忽成咁點信得過呀？班波今仗除咗有杜查奧斯基倦勤之外，仲有中堅波迪亞停賽，雖然會方已經為另一位要坐波監嘅球員加利美度提出上訴，不過呢位智利中場日前喺聖地亞哥機場掌摑女記者被捕，延遲歸隊之餘仲畀傳媒炮轟，就算今晚開波前上訴成功可以落場，都唔知會唔會影響表現。

反觀馬略卡今季其實幾硬淨，開季5戰保持不敗，對上兩場敗仗咁啱都係晨早有球員被逐，以寡敵眾，賽前中場荷西馬迪就講到明，已經同班手足傾過，希望吸取兩場敗仗嘅經驗盡量減少無謂犯規，加上馬略卡近4次同西維爾交手錄1勝2和1負戰績唔係太輸蝕，照計今仗要搶番分唔難。