薩克達主場拆車
2012/10/23文:阿占
今屆歐聯E組賽事相當惡踢，由森巴四子帶領嘅薩克達上場作客撳住祖記嚟砌，表現令人驚喜！今晚佢哋返到主場，迎戰近期硬仗連場嘅車路士，阿占十分期待薩克達嘅「森巴四重奏」再有好表現，讓平半好值得支持。

皇馬、曼城同多蒙特身處嘅死亡D組固然要留意，但邊個估到E組一樣咁精彩？正當球迷認定車路士同祖雲達斯會攜手出線，但頭兩輪踢得最好嘅竟然係烏克蘭勁旅薩克達！

球迷籲巴西徵召四子入伍
薩克達有差唔多半隊巴西兵，令呢隊波既有森巴式嘅細膩腳法，亦有烏克蘭嘅機動同效率，兩種截然不同嘅踢法又融合得出奇地好。不過最搶眼莫過於由阿歷士泰斯拿、雷斯阿祖安奴、費蘭甸奴同韋利安組成嘅「森巴四重奏」，上場對祖雲達斯就係呢四位巴西好波之人嘅表演時間，作客意大利照樣搓到祖雲達斯頭暈，最後被迫和1:1係相當唔抵。賽後已有唔少呼聲叫巴西國家隊選晒「森巴四重奏」入國家隊，就知道佢哋嘅表現有幾好，今仗返去烏克蘭地頭，表現更加令人期待。

車仔撼完熱刺仲未回氣
車路士貴為上屆歐聯冠軍，陣中都有個巴西新星奧斯卡杜斯山度士喺今屆歐聯上位，雖然佢哋喺英超做緊領頭羊，弊在喺歐洲賽表現其實唔算好突出，首仗對祖雲達斯贏兩球都畀對手追和，响超級盃更加畀馬體會大炒一場，證明呢隊歐洲冠軍絕對唔係咩無堅不摧雄師，何況佢哋啱啱先踢完對熱刺場倫敦打吡虛耗元氣，又要寄掛對曼聯場波，相信今場遠征烏克蘭會疲態畢露，捧薩克達就無走雞啦！

歐聯E組

頂占筍盤：薩克達