巴塞大殺四方
2012/10/23文:張健峰
歐聯今晚戰火重燃，其中巴塞隆拿會喺魯營恭候些路迪，進行G組第3輪分組賽。「地上最強」近期根本就唔知個輸字點寫，主場出戰梗係不勝無歸啦，要拗頸或者支持入球細嘅話，真係心血少啲都唔掂。不過考慮到巴塞贏波冇乜肉食，美斯呢排腳風又咁順，倒不如博個中位數3.5球嘅1.6倍入球大仲好路。

巴塞布斯基斯停賽唔識守
唔知係咪人逢喜事精神爽，就快做老竇兼攞歐洲金靴獎嘅美斯，近期入球停不了，入波對佢嚟講易過打機，話佢一個撐起隊巴塞絕對唔過分。上周作客拉科魯尼亞，巴塞早早領先3球，每當畀拉科追近，美斯就挺身而出將比數拉開，最後幫隊波以5:4險勝收場，總算攞晒3分。無論喺球會抑或阿根廷國家隊，美斯都弗到漏油，有晒球王風範。

今季美斯領導巴塞中前場表現亮麗，主帥維蘭路華亦以7勝1和嘅聯賽戰績，成為西甲史上最佳「新丁」教頭，指揮官沙維亦將會第150次代表「地上最強」出席非本土賽事，巴塞真係事事順境。不過後防欠穩始終係佢哋一大隱憂，佩奧爾、 碧基、 丹尼爾同艾比度今季輪住傷病，門將域陀華迪斯亦周不時有蝦碌鏡頭，連防中布斯基斯今場都要停賽，攻勁守弱，仲唔係入球大嘅方程式？

些路迪橫死掂死博一鋪
對家些路迪一向喺蘇超聯賽打橫行，但去到歐聯嘅表現就只係麻麻，不過佢哋今屆抽到好籤，同組對手係得巴塞一枝獨秀，其餘嘅賓菲加同莫斯科斯巴達都講唔上係乜超班貨色，何況些路迪上輪作客莫斯科都攞晒3分，班球員梗係心雄啦！睇番希臘國腳森馬拉斯上輪完場前頭槌頂入致勝「士哥」，功架十足，既然去到魯營都係死路一條，話唔埋豁出去會有驚喜，即管睇吓森馬拉斯又幫唔幫到手數番十胡，開個入球大。

歐聯Ｇ組

張峰來料：入球大

巴塞交手未贏多過2球
‧巴塞最近8場波未輸過。

‧些路迪作客未贏過巴塞。

‧巴塞6對些路迪都未試過淨勝2球以上。