曼城博出線實發癲強捧1.75倍客W
2012/10/24文:阿占

歐聯死亡D組好戲今晚繼續上演！英超冠軍曼城經過兩場只得1分之後，形勢似係重蹈上屆分組賽出局嘅覆轍，不過呢支億萬大軍肯定冇咁易投降，嚟緊佢哋會連續兩鬥同組最弱嘅阿積士，文仙尼已經落柯打要搶晒6分。今晚曼城率先作客荷蘭，雖然雙方今場都有進攻核心受傷缺陣，不過論人腳同後備兵源，曼城又何止高阿積士幾班？呢個1.75倍客勝易過借火啦！

阿積士今非昔比
曼城上場分組賽，靠巴洛迪利一記爭議性12碼，臨尾逼和多蒙特搶番寶貴1分，嚟緊兩輪由皇馬同多蒙特互相廝殺，曼城只要實現「雙殺」阿積士嘅任務，出線形勢就有機會由被動變主動。雖然西班牙中場大衞施華踢國際賽時受咗傷，好在拿斯尼、耶耶托尼都一樣孭得起隊波，呢個就係曼城得人驚之處，今場佢哋係就係冇地利，但都有本錢以質取勝。

另邊廂主隊阿積士都有南非大腦施利路重傷，據聞今年內都唔可以上陣，嚴重打擊呢支荷甲球隊嘅戰鬥力，事實上阿積士已經唔係當年嗰支叱咤歐洲嘅班霸，上仗畀皇馬大炒就見到佢哋招架乏力，今仗面對背水一戰要贏波攞3分嘅曼城，莫講話想攞分，唔使畀人大炒已經還得神落。

歐聯D組

頂占筍盤：曼城