曼城 史雲斯翻身「大」作戰
2012/10/27文:阿占 
 

喺歐聯失利嘅曼城，雖然喺英超仍然保住不敗身，但睇番佢哋條防線真係流到爆，幾場波都係靠班前鋒打救，今晚對住喪攻嘅史雲斯，想唔失波真係冇乜可能，惟有寄望阿古路等神箭可以再救曼城一命，同急於證明自己嘅史雲斯射手米捷鬥攻，開出2.1倍「入球大」啦！

曼城喺歐聯面臨出局，阿占其實唔覺得太意外，事關呢班波唔識防守，個領隊又好似玩緊足球經理咁亂排陣，出到歐洲一定無碇企。大家若果有留意曼城比賽嘅話，都肯定見到佢哋中路任人突破、兩翼或兩閘出波冇人理，真係要幾甩漏有幾甩漏！難怪堂堂英超冠軍今季各項賽事加埋踢咗13場波，竟然只得1場保住清白身，其中6場畀對手攻入2球或以上啦！

史雲斯米捷射手榜1哥
唔識防守嘅曼城，勝在有一班好好嘅前鋒，阿古路有幾勁唔使多講，就連迪斯高喺對富咸同西布朗兩仗亦上演「絕殺救主」，泰維斯、巴洛迪利同拿斯尼季初都有完場前入波嘅表演；曼城家陣雖然爆出內亂，但呢班球星勝在個個有鬥心，今鋪肯定會搏命求翻身，即使呢支絕地求生嘅歌仔唔係場場有得唱，不過要上演入球騷就冇乜難度喇。

對家史雲斯喺季初係威係勢，到近排狀態稍為回落，排咗喺聯賽第10位，但咪因為咁就以為佢哋好好恰，事關呢班波今季10戰有7仗至少入2球，西班牙後上王米捷更加係平地一聲雷，依家揸住6個聯賽士哥，同尹佩斯、丹巴巴亞並列射手榜榜首，有料到o架！而且史雲斯領隊米高盧特立祟尚進攻足球，肯定會落柯打繼續喪攻博翻身，今場對住曼城條豆腐防線，點會冇波入吖，兩軍鬥攻，入球大細中位數去到3.5球都冇有怕，一於照捧大啦！

曼城半場旺開1:0
‧兩隊各自近8場比賽都開咗6場大。

‧曼城今季8輪聯賽有4次半場開「1:0」波膽。

‧史雲斯近8戰有5仗半場落後。

頂占筍盤：曼城
有線球彩台主持阿占

電郵：soccer64@cabletv.com.hk

網上討論：http://fb.com/icable64

PHONE波熱線：1831 678

「超級星期六」開放時間：周六晚9:00至11:30