國立對賽往績唔旺清水
2012/11/03文:九叔

响東京國立球場踢決賽，對所有日本球隊嚟講係個榮譽，但係對清水心跳嚟講可能係痛苦，事關佢哋响國立上演嘅盃賽決賽4戰鹿島鹿角只贏過1場，今日日聯盃決戰雙方碰頭，都係博鹿島上盤划算啲。

如果計今季日職排名，第4位嘅清水甩開第13嘅鹿島成條街，不過足智開出嚟嘅鹿島客W明顯熱過清水，亞洲盤仲要客讓平半，顯然清水被睇低半線。點解會咁？首先由雙方歷史上41次交手去講，鹿島取得18勝8和15負些微佔上風，但係最關鍵係兩隊响國立打過天皇盃、超級盃4次決戰，清水得1勝3負，而且贏嗰次係得個虛銜嘅超級盃，似乎國立唔係咁利佢哋囉。

大迫勇也鍊盡博入國家隊
從近況去睇，清水6戰不敗的確醒神過鹿島，一個星期前仲响日職作客贏過對方2:1添，不過清水都有輸蝕嘅地方，首先係主力陣容平均年齡得23歲，缺乏決賽經驗，中場杉山浩太又坐波監，呢位27歲嘅仁兄係清水嘅「老」大哥之一，少咗佢後果係點大家估到。

相反，爭取冧莊嘅鹿島就傷疲盡起，左腳受傷嘅中場連拿度卡查、「大腦」小笠原滿男都會重披戰袍，「怪物」大迫勇也直情講到明要捧走日聯盃，希望畀沙哲朗尼好印象，選佢入去日本國家隊。鹿島有「國立」射住，班球員經驗又夠，响呢場決賽值得睇高一線。

日聯盃賽制
今輪為決賽，以一場過分勝負，若法定時間內打成平手，則需加時作賽，再和就互射12碼決勝。