曼城群星撐文帥搏甩髀
2012/11/03文:江忠德

唇亡齒寒！球員梗係知道假如領隊有乜冬瓜豆腐，一朝天子一朝臣，踢緊正選可能變後備，坐緊板櫈就要執包袱，所以幾大都撐住先，只要曼城上下一條心，就可以將喺歐聯嘅悲憤，喺英超化為力量，今晚作客韋斯咸有好戲睇！

曼城喺歐聯嘅表現可以用衰到貼地嚟形容，點解身嬌肉貴嘅粒粒巨星完全冇晒戰鬥力？好簡單，原因係主帥文仙尼歐戰指揮能力有限，特別係客戰臨場調兵遣將方寸大亂，注定曼城唔單止可能提前出局，甚至連歐霸盃資格都會冇埋添。

韋斯咸對攻等同自殺
就喺近期曼城換帥消息滿天飛之際，球員突然集體表態支持文仙尼，無他嘅，大家都希望長玩長有，依家最實在嘅梗係專注英超盡快搶佔榜首，作客韋斯咸搏甩髀！

艾拿戴斯將韋斯咸打造成一支追求技術型嘅球隊，但係對住「藍月亮」始終實力次一皮，近12次對陣只得1勝3和8負完全處於下風，主場不自量力傾巢而出，咁樣會凸顯防守漏洞畀曼城有機可乘。