拜仁大炒格
2012/11/10文:查理阿蛋
回復強勢嘅拜仁慕尼黑今晚將於德甲主場迎戰法蘭克福，前者早排輸一輸反而踢得更醒神，法蘭克福雖然不復季初強勢，但火力仍然十足，入球中位數開到3.5都照捧1.88倍「入球大」啦！

幫軒歷基斯搶長期飯票
拜仁早排輸畀利華古遜後強勢反彈，之後3場全部獲勝兼大炒對手，夾埋入咗13球咁多，相當誇張！除咗洛賓復出後接連有進帳外，馬里奧高美斯復操亦為感冒初愈嘅文迪蘇傑增添壓力，後者肯定會搏盡保住正選位置，當然要拎法蘭克福祭吓旗啦！呢支「德甲一哥」近日仲傳出放棄換帥計劃並同軒歷基斯續約，相信班波都會幫手踢場好波，等教頭張長期飯票早日到手。

現時排第3嘅法蘭克福近4場僅得1勝，上場對護級嘅格雷特霍夫都要靠門神奇雲查普精彩演出先和到波，今次造訪安聯球場可以話必死無疑！不過教練艾明費就講明唔理咁多照踢進攻足球，死都要死得好好睇睇咁話，佢哋有連續3場有波入嘅美亞同埋乾貴士壓陣，絕對有資格拍住拜仁做番場入球騷o架！