曼城 熱刺開「大」騷
2012/11/11文:張健峰
今晚英超又有大戰上演，上季聯賽冠軍曼城主場迎戰熱刺。兩隊近期表現好飄忽，曼城唔知係咪受傳聞中嘅內訌影響，表現大幅下滑，近5場比賽只得2場贏波，仲要係僅僅熟嗰隻，毫無說服力。熱刺主場對車路士慘敗之後，表現亦開始飄忽，上周主場竟然輸畀韋根！既然兩隊最近都冇路捉，大家又係攻強守弱，今晚個1.57倍入球大應該無走雞。

及300、廣東體育周日晚9:30直播）

強隊互撼勁入波
正所謂「家衰口不停」，曼城近期成績唔掂，負面消息自然出晒嚟。以「藍月亮」嘅財力同人腳，喺歐聯搞到喺出局邊緣，領隊文仙尼當然孭晒鑊。有消息話一班球星已經對文帥嘅領軍有微言，英國傳媒更狂煲哥迪奧拿會接手嘅消息，將帥不和對士氣一定有影響，支持曼城嘅上盤客真係要諗清諗楚。

擁有泰維斯、阿古路、耶耶托尼、拿斯尼、迪斯高等戰將嘅曼城，要撕破熱刺條防線難度唔高，只係中後場球員往往急於進攻，容易暴露後防空隙，中堅隊長高柏尼狀態大不如前，今晚對住熱刺幾件高速前鋒，尤其射手迪科爾喺周中歐霸盃連中三元狀態大勇，睇怕曼城都幾難保住不失。

事實上，近幾季英超嘅強隊互撼，成日都有入球騷出現，今季曼城2:2和利物浦、車路士2:3輸畀曼聯、熱刺2:4輸畀車路士，數埋上季更加出現過8:2、5:1呢啲戰果。原因可能係強隊擁有高質素球員，喺節奏明快嘅英超大戰，往往製造同把握到入球機會，以致大手交易經常出現，所以今晚都係再追「入球大」好過估勝和負啦！

曼城近年交手慣食「刺」
‧兩軍近5次對賽，曼城得4勝1和保持不敗。

‧拿斯尼近3次於聯賽對熱刺均有入球，唯一冇入波嘅賽事亦交出助攻。

‧曼城近34場主場聯賽保持不敗。

博「藍月亮」再煲魚生粥
曼城今季戰績係有所下滑，就算贏波都係險勝居多，6場勝仗有4場煲魚生粥，既然「藍月亮」主場演出一向有保證，聯賽主場已經34場不敗，不妨冷敲3.55倍「讓和」博主隊再次小勝啦！

張峰來料：曼城