意大利90後博上位 生劏「Hea踢雄雞」
2012/11/14文:卡爾萬

主帥柏蘭迪利執教意大利後銳意改革，除咗放棄防守足球嘅一貫傳統，仲不斷提拔新人幫球隊換血。今晚呢班博上位嘅後生仔，喺主場迎戰對熱身賽態度有所輕視嘅「高盧雄雞」法國隊，小讓平半嘅1.9倍上盤撐得過。

柏帥換血棄用老將雙「奴」
柏蘭迪利今次點兵預埋巴洛迪利外，亦徵召艾沙拉維同迪斯度呢兩名喺球會有上佳發揮嘅年輕前鋒，同時放棄卡斯辛奴同基拿甸奴等老將，明顯想打造一條年輕有活力嘅「90後鋒線」。雖然迪羅斯喺聯賽粗暴打人領紅，被軍紀嚴明嘅柏蘭迪利叮走，但中場依然有攻守兼備嘅馬治斯奧同蒙杜利禾，加上派路分波策動攻勢，呢班博表現爭上位嘅生牯仔，入波隨時如魚得水。

法國主帥迪甘斯上任後3戰世盃分組賽2勝1和，當中仲包括作客逼和西班牙，睇落極之對辦。不過去到熱身賽就唔係咁睇喇，2次主場強陣出戰分別悶和烏拉圭同輸畀日本，可見佢哋對熱身賽態度唔多認真。今趟作客意軍，就算艾拉、列貝利同卡比耶一班主力在陣，但利刃賓施馬因傷落選，隨時前面入波唔成，後面畀意大利班後生仔玩到陀陀擰。