橫濱秘密武器係三浦知良？ 平手盤撐千葉最理想
2012/11/18文:九叔

搵三浦知良做秘密武器？咪玩啦！日乙隊FC橫濱今日响升班附加賽4強，出戰防守出眾嘅千葉市原，居然話旨意呢個45歲嘅前日本國寶爭勝喎，點信得過呀！平手盤梗係要千葉啦。

橫濱今季喺日乙以第4名衝線，排名高過千葉市原1位，但係兩班波其實半斤八両，各方面數據都好接近，不過千葉勝在防守堅韌，今季42場聯賽，只係失咗33球，係日乙失球最少嘅球隊，仲勁過冠軍甲府風林嘅35球，反而橫濱失咗45球，叻唔過啲中游隊伍幾多。

至攞膽係橫濱今日嘅爭勝「秘策」，原來係用三浦知良打正選喎，呢位高齡球員過去1個月，代表日本5人足球隊踢世界盃，根本就冇乜掂過大足球，佢係到3日前至歸隊跟操，你話信唔信得過嘞。

FC橫濱主場冇着數
仲有樣嘢要提醒大家，橫濱唔只前線靠老餅，個龍門史尼達潤之介亦都成3張半嘢，祖籍瑞士、17歲至由後衞改打龍門嘅佢，雖然有成1米85嘅身高，但係到上一場波至達成日乙200戰嘅紀錄。三十幾歲人至踢足200場乙組波，潤之介真係好打有限。

雖則橫濱今日响三澤球場出擊佔有地利，可惜從往績去睇，佢哋對住千葉輸多贏少，4次主場出戰只得1勝1和2負，數據睇見都唔開胃，平手盤自然揀千葉客勝合理啲。

日乙附加賽賽制
賽事以一場過分勝負，若法定時間內打成平手，不設加時或互射12碼，由常規賽排名較高一隊晉級。