曼城 皇馬士哥拿大鬥法
2012/11/21文:阿占
歐聯「死亡D組」殺入最後直路，相信好多人都估唔到英超冠軍曼城率先被拋離。雖然曼城領隊文仙尼已經扯白旗投降，不過為面子點都要踢番場爭氣波同球迷交代。今晚主場迎戰皇家馬德里，就係挽回多少尊嚴嘅好時機。既然雙方陣中都有大批「士哥拿」，駁起火嚟開出1.52倍入球大話咁易啦！

文仙尼考慮出埋迪斯高
「藍月亮」曼城喺分組賽4場波未贏過得2分排包尾，少呢場對手、排第2嘅皇馬成5分咁多。文仙尼都話要有奇迹先可以出線，似乎連續第2年分組賽出局幾成定局。不過認輸又唔代表會放軟手腳，依家盛傳曼城搵緊哥迪奧拿接手，無論點文仙尼都要證明自己有能力帶隊喺歐戰攞到好成績，呢場再鬥皇馬就係一個好機會。

首仗曼城作客皇馬臨尾香反輸2:3，上場鬥阿積士先失兩粒下追平，但最終反勝唔到係有啲黑仔，事實上前鋒線嘅阿古路、泰維斯同迪斯高入球能力唔使懷疑，佢哋幾個今場對住有馬些路仲抖緊嘅皇馬防線，上場英超又大炒阿士東維拉熱晒身，只要今場放開包袱踢，實在唔愁無波入，何況賽前《曼徹斯特晚報》尋晚仲爆料，話文仙尼可能加多件迪斯高落去，實行同皇馬死過！

希古恩繼續抖 新星莫拉塔奇兵
皇馬依家一方面要保住出線資格，另一方面梗係望攞多幾分，同多蒙特爭首名出線，所以今場就算作客亦會全力搶3分。眼部受傷嘅C朗今場繼續孭飛，雖然希古恩依然養傷，但後備新星艾華路莫拉塔表現唔錯，隨時會係皇馬進攻一路奇兵。「銀河艦隊」入球能力全球數一數二，上場又剛剛大炒完畢爾包，今晚球迷可以安心等睇入球騷啦！

皇馬歐聯4戰全大
‧曼城近5場不敗，兼連續3場攻入2球或以上。

‧曼城近10場主場7場開大。

‧皇馬4場歐聯分組賽全部開大。

‧皇馬4場歐聯分組賽3場先失波。

曼城焗攻皇馬客W抵捧
曼城今場一定要全取3分，否則緣盡歐聯，不過皇馬同樣要袋呢3分確保出線，兩隊皆戰意十足。不過形勢上曼城被動啲，一定要擺大個頭主動出擊。相反皇馬就唔驚你唔攻，擅於計算嘅莫連奴最拿手就係打反擊，隨時幾下快速反擊就收死曼城。講真吖，曼城主帥文仙尼無論上年定之前教國際米蘭，歐聯表現次次都令人失望，睇怕今場皇馬隨時直接踢曼城出局，客勝值博。

頂占筍盤：入球大
歐聯D組