車仔亂龍 曼城抵捧
2012/11/25文:阿占
英超今晚上演重量級3D大戰！車路士炒咗迪馬堤奧改請賓尼迪斯後，第一擊就喺主場迎戰衞冕嘅曼城，呢刻史丹福橋球場風雨飄搖，突然換帥難免影響球員心情，況且賓帥能力亦備受質疑，上星期先重奪榜首嘅曼城當然唔想咁快畀人扯番落嚟，今場一於大打落水狗，平手盤捧曼城冇得輸。大家快啲拎副立體眼鏡出嚟睇204台3D直播啦！

及300、廣東體育周一凌晨0:00直播）

藍戰士9場勁失19球
藍戰士近期成績係跌晒Watt，不過英超始終係長途賽，車仔依家只不過落後曼城4分，阿布拉莫域咁就將幾個月前幫你捧歐聯、贏足總盃冠軍嘅領隊炒魷，班球星一時間肯定難以適應。尤其是賓尼迪斯向來唔擅長車仔今季用開嘅短傳入滲，車仔陣中又有好多新合作嘅球員，開季以嚟嘅努力磨合就咁化為烏有，都咪話唔洩氣。

其實車仔滑落都唔怪得晒迪馬堤奧，隊長泰利停賽同受傷缺陣都好大影響，大衞雷斯同加利卡希爾呢對中堅組合攻優於守，搞到車仔失球數字持續高企，最近9場一共失咗19粒，今場對住曼城條黃金鋒線都幾難頂。

藍月亮3射手輪流發威
同車路士相反，「藍月亮」曼城近期就愈踢愈順，近7場聯賽狂取6勝1和，阿古路、泰維斯同迪斯高3大射手輪流發威，就連之前被插唔掂嘅防線都有改善，近6場聯賽只係失咗2球，以曼城依家嘅狀態，作客贏車路士絕對唔係難事囉！

兩隊碰頭多12碼
‧車路士近7場聯賽場場有失波。

‧雙方對上6次喺聯賽碰頭產生咗5球12碼。

‧曼城係今季英超唯一不敗之師。

首球捧車仔剋星泰維斯
唔講唔知，原來泰維斯近6次喺英超對車路士入咗6球，堪稱係「藍戰士剋星」。車路士條防線唔穩陣，周中歐聯先勁吞祖雲達斯3蛋，冇咗隊長泰利鎮守後防始終有隱憂，曼城入波先好合理，首入梗係向專剋車仔嘅泰維斯埋手啦！

頂占筍盤：曼城