拜仁文迪蘇傑 小豬復出

拜仁周中作客輕鬆贏弗賴堡兩蛋，撞正前列球隊齊齊失分，依家打完14輪，已經分別帶離次席利華古遜10分同季席多蒙特11分，成為史上最早攞到冬季冠軍嘅球隊。翻查紀錄，過往49支德甲冬季冠軍有32次帶得到尾捧盃，比率高達6成半。不過以為拜仁會就此放軟手腳等個冠軍盾送上門，就肯定錯喇，上季佢哋首循環都係做一哥，帶甩多蒙特3分，最後慘被反超失落冠軍，吸收過上次教訓，依家肯定格外搏命。

拜仁強勢滅「蜂」
 
啱啱成為咗德甲冬季冠軍嘅拜仁慕尼黑，今晚喺聯賽大戰主場鬥多蒙特，當然希望食住個勢報仇成功，終止近4次聯賽交手全輸嘅走勢。拜仁論狀態同鬥心都明顯佔先，加上今場有首席射手文迪蘇傑同中場指揮官「小豬」舒韋恩史迪加齊齊復出，強陣o趙硬「蜜蜂兵團」，梗係捧1.65倍主勝啦！

祖記向多蒙特開價買羅拔仔
陣容方面，除咗快翼洛賓同中場路爾斯古斯達禾因傷缺陣外，周中收起嘅兩大進攻重心文迪蘇傑同「小豬」都有望復出。當中今季入咗9球、排喺射手榜首席嘅文迪蘇傑，隨住隊友馬里奧高美斯復出，正選位置將受挑戰，今晚當然要博表現騷「哥利」。至於「小豬」嘅分波能力毋庸置疑，有佢壓陣，進攻多變化好多，難怪前拜仁主帥希斯菲特都預言今場拜仁可以贏3:2啦！

多蒙特呢邊，周中對住杜塞爾多夫捉到鹿唔識脫角，射門次數係21對5，控球率多達65%，點知都係踢和1:1攞唔足3分，今季德甲已經和咗5場，爭標形勢落入下風。佢哋今季表現稍嫌反覆，周中休戰嘅曉姆斯、根度簡同馬里奧葛斯都話未知趕唔趕得切傷愈，意大利《體育戰報》尋晚又傳祖雲達斯已經正式開價，响歇冬嗰陣買起羅拔利雲度夫斯基，牆腳都畀人撬埋，今鋪對住決心十足嘅拜仁恐怕凶多吉少。