今晚歐聯分組賽最後一輪，已經肯定首名出線嘅曼聯喺H組迎戰克盧日，紅魔嚟緊周末要作客曼城上演英超榜首大戰，今場肯定畀班主力休息為「復仇」作準備，就算贏波都唔慌贏得多，不如冷敲3.5倍「讓和」啦！

曼聯已經篤定首名出線，難怪費格遜唔等呢場完埋，就勁心急咁向文仙尼「發炮」，係咁煽動文帥力爭歐霸盃席位，等班球員有歐洲賽踢Happy啲，唔好專注聯賽咁話喎！只可惜曼城落晒禁口令，費Sir見冇人應佢可能覺得冇癮，但為咗周末場曼市打吡，今場留力就事在必行。

面子攸關，小妹相信就算曼聯出副選，喺奧脫福主場點都會盡力踢番場好波，畢竟紅魔今季足足10次喺落後下反勝，證明佢哋鬥心夠晒強。加上傑斯、基斯史摩寧同埋「反勝王」查維亞靴南迪斯等後備兵個個有番咁上下質素，只要唔輕敵要小勝克盧日唔算難。

雖然話曼聯上仗對雷丁勁失3球，條防線仲畀費爵爺鬧爆，但好消息係後防大佬尼曼查維迪有機會復出，相信可以堵塞防線漏洞。對手克盧日今場只要搶到分，都仲有機會同加拉塔沙雷爭出線，佢哋近5場作客亦未輸過好似幾弗咁，不過查實已經連續6場外訪都有失波，條防線靠唔住，想搶分出線16強？留番啖氣踢歐霸盃好過啦！

歐聯H組