歐聯G組只剩下次名之爭，由同得7分嘅賓菲加同些路迪爭逐16強席位，喺賓菲加要作客硬撼巴塞嘅劣勢下，些路迪對住篤定出局嘅莫斯科斯巴達，只要贏波就好大機會出線，不過主場穩打穩紮嘅佢哋隨時煲魚生粥，3.5倍「讓球和」值博。

目前些路迪計對賽落後畀賓菲加排第3，但後者要作客魯營不敗嘅巴塞唔輸都偷笑，所以些路迪只要全取3分，出線機會都幾樂觀。

係，雖然中場雲耶馬黃牌夠數停賽，但其餘主力可以落場搏殺不特止，日前蘇格蘭足總盃，些路迪更收起9名主力養精蓄銳，而且佢哋喺今屆歐聯分組賽主場，淨係失過1球畀巴塞，既然目標係3分，贏1球守到尾唔奇呀！

至於莫斯科斯巴達前鋒阿里揚言今趟嚟蘇格蘭唔係旅行，要畀驚喜大家砌低些路迪喎。不過佢哋唔單止分組賽作客1分都未落過袋，喺俄超仲要連續兩場主場畀人大炒，點信你呀！加上箭頭艾文歷基畀些路迪中堅伊菲岩布斯呢位尼日利亞隊友吼晒路外，喺些路迪成名嘅艾登麥基迪傷愈倒戈，隨時同前者同一下場，咁樣邊有入波本錢呀！

歐聯G組