聯賽停辦艾阿里為錢而戰

原來今次已經係艾阿里第4度出戰世冠盃，佢哋喺06年曾經係威係勢攞過季軍o架！不過近排呢支埃及班霸有個大難題，就係埃及自從今年2月發生過一件導致72人死亡嘅球場慘劇後，個聯賽就一直暫停到依家，艾阿里唔單止無聯賽踢，連收入都好成問題，所以球會高層呢次肯派隊出戰世冠盃，着眼點都係放喺獎金度，小弟就覺得無論心態定狀態都唔多健康囉！

哥連泰斯強爆艾阿里
世界冠軍球會盃4強今日開打，好可惜兩支亞洲球隊廣島三箭同蔚山現代已先後出局，不過今日場艾阿里對哥連泰斯都仲有啲睇頭，話晒艾阿里係非洲冠軍，哥連泰斯就係南美冠軍，實力點都有番咁上下。當然貨比貨嘅話，南美足球梗勁過非洲波好多啦，何況哥連泰斯今屆一早做足準備，「夫添」出戰睇怕要贏艾阿里唔難，1.39倍客勝絕對值得捧場。

哥連泰斯王牌前鋒傷愈
相反哥連泰斯對今屆世冠盃志在必得，佢哋早一個禮拜已經拉隊去杜拜「叉電」兼適應時差，之後先進駐日本基地，部署有晒計劃，相信班球員已經熟習咗亞洲嘅環境同氣候。而且好消息陸續有來，秘魯前鋒荷西古里路嘅韌帶傷患，經過軍醫連日悉心照顧後已經好得七七八八，左肩有傷嘅龍門卡斯奧亦問題唔大，今場有望復出，哥連泰斯「夫添」出擊，响日本Fans又多，等於半個主場，要贏波殺入決賽唔難啦！

哥連泰斯失波少
‧哥連泰斯喺南美自由盃14場賽事只失4球。

‧哥連泰斯7場南美自由盃作客比賽，拎到2勝5和不敗成績。

‧憑非冠盃攞到參賽資格嘅艾阿里火力不俗，10場波合共攻入22球。

下半場搏殺吼晒和主、和和、和客
雖然艾阿里經過對廣島三箭一仗後，適應程度應該比首度登場嘅哥連泰斯優勝，但後者喺南美自由盃14場波入面只失咗4球，防守非常硬淨。相信艾阿里今場唔敢輕舉妄動之餘，盃賽以穩為先嘅哥連泰斯半場都會睇定形勢先再作打算。呢啲一場過嘅賽事，下半場互相搏殺真係邊隊都有權晉級，一於吼晒和主、和和、和客三瓣。

世冠盃賽制
艾阿里對哥連泰斯為4強戰，若法定時間內打成平手，則需加時作賽，再和就互射12碼決勝。廣島三箭對蔚山現代則為爭第5名賽事，打和直接互射12碼決勝。

頂占筍盤：哥連泰斯