人冇夢想同條鹹魚有咩分別？西甲歇完冬重開今晚先有場獨腳戲，由貝迪斯作客中游分子薩拉戈薩，客軍除咗力爭歐洲賽席位外，一班冒起嘅重心球員更希望藉好表現打入國家隊，實現世界盃之夢，咁有火，小妹當然力撐3.15倍客勝啦！

貝迪斯上季先至重返西甲，今季到季中居然守得住前列位置，表現令人驚喜，陣中守將芝卡就話家陣嘅貝迪斯境況好到「好似發緊夢一樣」，但佢亦提醒球隊始終返番西甲冇耐，首要目標仍然係拎到42分確保護級成功，之後先係更遠大目標：「爭取歐洲賽資格！」中場比納特更憑住出色表現，成功喺2012年入選西班牙國家隊，當家射手魯賓卡斯度亦講明會繼續勁入波，以打入國家隊為目標，成隊波絕對係着晒火！

況且貝迪斯歇冬前嘅表現亦相當勇猛，雖然意外不敵馬略卡，但之前6仗只試過僅負巴塞，擊敗皇馬更係代表作之一。薩拉戈薩今季聯賽喺自己地頭8戰只得3勝，近2次亦吞蛋收場，憑住貝迪斯搶分嘅決心，小妹絕對睇好佢哋作客擊敗薩拉戈薩。