巴塞「生牯仔」發威！今晚巴塞隆拿喺西班牙盃16強次回合迎戰「乙組仔」科爾多瓦，肯定會派出多名副選或青年軍應戰，雖然客軍講明唔會輕易認輸，但家陣連巴塞B隊喺西乙嘅排名都遠比佢哋高，小妹相信一班拉馬西亞產品嘅能力，讓到2球都照捧1.72倍「讓主」！

美斯、恩尼斯達等巴塞巨星啱啱先由蘇黎世嘅金球獎頒獎禮回歸冇耐，而且過幾日又要作客惡鬥馬拉加，照計教頭維蘭路華喺呢場西盃賽事會畀班主力抖抖，順便同親友慶祝獲獎，今場當然係一班副選同埋青年軍爭上位嘅好時機，除咗韋拿、馬斯真蘭奴同埋堤亞高艾簡達拿等二線兵外，唔少B隊嘅小朋友都勁有質素，睇佢哋家陣喺乙組排第5，排名高過第12、今晚來訪嘅科爾多瓦咁多就知喇。

其中一位不得不提嘅就係超新星迪奧羅夫喇，呢位18歲翼鋒今季已經為巴塞B隊射入11球之多，目前為西乙次席射手，啱啱喺12月先轉投美職嘅前巴塞B隊球員路沙更大爆，教練團已經準備好喺短期內畀迪奧羅夫開始融入一隊，今場話唔定就係好機會，維蘭路華更親自「下旨」暫時唔會畀佢外借到其他西甲球會，明顯有前途喎！

科爾多瓦喺首回合失咗2個作客入球，次回合要作客巴塞，晉級機會已經名存實亡，就算佢哋嘅門將阿爾拔圖加西亞話好有決心要贏，都只不過係門面說話，以巴塞近12場贏足11場嘅強勢嚟睇，科爾多瓦唔畀對家炒七個一皮已經算執到喇。

首回合：巴客贏2:0