波爾多PSG鬥攻開大騷
周日法甲壓軸大戰波爾多主場迎戰巴黎聖日耳門，呢啲前列對決最終結果係點好難講，不過波爾多有想力證身價嘅箭頭高法蘭爭士哥，PSG又有伊巴謙莫域呢部入球機器壓陣，雙方前鋒大鬥法，有望開出2.2倍入球大！

高法蘭爭士哥博轉會
波爾多至今喺聯賽主場3勝6和未輸過，係唯一保持不敗金身嘅法甲球隊，佢哋近戰先後喺法國足總盃淘汰查多魯同喺聯賽擊敗前列分子雷恩，可見歇冬後狀態弗爆。雖然進攻中場奧拜尼亞克繼續養傷，好在前鋒高法蘭、沙維特上仗缺少呢位派牌好手支援照樣搵到食，證明唔齊腳對Top Fit嘅佢哋嚟講影響輕微。再者拒絕續約後被掛牌出售嘅高法蘭，講到明想過英超賺英鎊，今晚實趁住冬季轉會窗未閂，落足力畀啲「潛在買家」睇辦。

另邊廂PSG上仗主場圍攻阿些斯奧無果，慘遭逼和不特止，紅牌被逐嘅防守中場莫達、受傷退下火線嘅中堅堤亞高施華，今晚雙雙缺陣搞到防線中門大開，唔使諗都知會係大盤客嘅恩物。驚單靠波爾多開唔到大？加埋伊巴謙莫域呢部PSG入球機器就肯定夠數，呢支瑞典神箭現時以18球高踞聯賽射手榜首位，其中12球仲係喺作客攻入，火力比起主場翻倍，今場2.2倍入球大在望。