西悉尼弗到漏W「德」
 

近期表現跌Watt嘅阿德萊德聯，今午喺澳職迎戰西悉尼流浪者，即使有地利，信唔過。事關「阿聯」上周一啱啱有主帥高斯米拿辭職，改由疑似「金手指」華堅尼頂上領軍，內部立立亂，面對住大勇嘅西悉尼，睇怕難逃一敗。西悉尼讓平半，安高撐2倍上盤。

阿德萊德聯易帥立立亂
高斯米拿突然辭職，雖然佢一直唔肯透露原因，除咗有消息話佢唔滿意球會同佢傾續約拖拖拉拉所以劈炮外，另一個說法就係話佢畀副手華堅尼篤背脊。家陣華堅尼上位，一上場就話睇睇月初因為同高斯米拿唔妥，搞到離隊去印尼搵食嘅球隊名將沙治奧雲迪克，肯唔肯回巢，華堅尼咁搞即係要同高斯米拿劃清界線，咁鬼冇品，球員嚟緊會唔會 佢支笛都好難講。何況今次都係佢第一次正式帶隊領軍，經驗不足真係信唔過o架！

再者，「阿聯」近排狀態真係唔多掂，自12月下旬開始，近7場聯賽只得2勝1和4負，排名亦由第2跌落第4位。最慘係佢哋今仗仲有次席射手摩拉利斯紐曼停賽，前鋒迪捷特又只係啱啱傷愈，狀態不足，冇攻擊力同等死有乜分別？

唔係講笑，西悉尼期3連勝狀態Fit到漏油，上仗幾乎有75分鐘打少個都照贏墨爾本雄心，加上入球分布點夠廣，今仗就算有右閘普蘭斯坐波監，都有本錢攞足3分。