英幼獅冇料到 搞唔掂瑞典U21
英格蘭U21今晚喺主場對瑞典U21，未必惡得出樣。話晒兩隊都係冤家，既然英格蘭大國腳向來畀瑞典剋死，青年軍對撼都唔見得有優勢，英格蘭U21領隊皮雅斯又隨時教到暑假唔撈，士氣咁曳，都係捧2.9倍「讓球客勝」好過。

呢場比賽喺華素爾舉行，大家知啦，英格蘭足球向來畀瑞典食住，心理上已先輸一截，更何況英格蘭U21根本唔受重視，領隊皮雅斯成日好似冇兵司令咁，想搵効力大球會嘅球員幫手，就多數畀人詐型，好似今次徵召曼聯嘅菲爾鍾斯，紅魔教頭費格遜就發火話唔明點解U21熱身賽都要預呢位大將喎！

傳皮雅斯暑假後劈炮
睇番陣容，今次英格蘭U21主要用利物浦啲o靚仔做骨幹，佢哋有5個球員入選，當中史達寧、佐敦軒達臣同舒維爾喺紅軍有唔少上陣機會，但其餘球員呢？皮雅斯最重用嘅前鋒域咸喺新特蘭長坐冷板，阿仙奴前鋒阿科比同車路士中場麥伊治蘭因為未夠料被外借，暫時只屬人球級別，咁嘅陣容，真係好打有限。

或者大家會對畀曼聯收購咗、但又外借番畀水晶宮嘅翼鋒韋費特沙夏有啲期望，但英國傳媒話，執教6年得個吉嘅皮雅斯原定下個月傾續約，但佢可能因為冇機會坐正執教國家隊，好可能暑假後劈炮，士氣勁唔掂，瑞典U21有燕豪芬中場希真麥克同阿爾克馬爾後衞馬迪亞斯祖漢臣歸隊，唔難保住不敗。