巴西搞寸三獅賀壽P
尼馬‧巴西萬人迷
  1/3 
 
 
謝拉特‧三獅軍中場
林柏特‧英格蘭鐵人
  2/3 
 
 
英格蘭助教加利仔帶住班兵練波。
  3/3 
 
 

尼馬＋細哨級數嬴哂
今年係英格蘭足總成立150周年，本來「三獅軍」今晚喺溫布萊迎戰巴西，好應該做番齣好戲「賀壽」，可惜無論睇往績定人腳，英格蘭瓣瓣都輸晒畀「森巴軍」，睇好有「細哨」同尼馬壓陣嘅巴西，可以搞寸個生日Party擊敗英格蘭，「森巴兵團」小讓平半，梗係捧2.01倍上盤啦！

溫布萊球場足足有成9萬個座位，但呢場周中舉行嘅「英巴大戰」門票，早喺1月尾已經賣清，就知呢場波真係舉世矚目！不過咪以為英格蘭有勁爆嘅主場氣勢、又掛住「A高第100戰」牌頭就可以力抗巴西，事關睇番兩軍近18年6次對賽，「三獅兵」根本未贏過「森巴軍」，踢法完全畀對手食住，想贏波幫足總開P真係難過登天囉。

鶴臣焗用「雙特」勁擇使
認為林柏特同謝拉特係今季英超最搶眼嘅球員，鶴臣亦好有可能為咗避免被英格蘭傳媒「批鬥」，再次同時起用「雙特」，不過大家都知啦，佢兩位老哥做朋友就OK，但做拍檔就賴嘢多過食飯，而且「雙特」年紀都有番咁上下，想同巴西條年輕有活力嘅中場線鬥？肯定蝕晒章啦！

森巴軍平均每場入3.25球
相反，巴西今次大軍嘅人腳全部都係當時得令嘅球星，前線除咗有「新球王」尼馬，喺上季巴甲力證寶刀未老嘅朗拿甸奴都獲重召，就算佢得番顛峰時期嘅6成，級數亦肯定比韋碧克等「三獅攻擊手」高幾皮，咪忘記巴西近8戰平均每場入成3.25球，唔計上仗用二線兵鬥阿根廷，之前嗰7場波都未試過失多過1球，英格蘭想靠反擊偷雞，唔容易囉！

森巴兵好「大」喜「攻」
‧上仗輸畀瑞典前，英格蘭11戰法定時間不敗，7勝4和。

‧巴西近8場僅1敗，其中6場開出入球大。

‧唔計上仗不敵阿根廷，巴西之前7場賽事都未試過失多過1球。

英格蘭唔識守 玩埋入球大
雖然話英格蘭喺鶴臣麾下大踢傳統嘅防守反擊足球，但佢哋近6戰當中，只得對聖馬力諾同摩爾多瓦呢2場波保持清白身，證明條防線唔算穩陣，今鋪面對攻強於守嘅巴西，就算偷雞入到波，都可能畀人數番幾粒，咁嘅環境，當然玩埋個1.95倍入球大啦！