史雲斯唔怕利物浦
今晚英超利物浦會喺晏菲路主場迎戰「白天鵝」史雲斯，「紅軍」近況低迷，連盃賽在內已經5戰不勝，雖然能夠作客賽和阿仙奴同曼城係好賽績，但兩場盃賽敗仗就認真抵鬧，可見呢班波海鮮味極重，對住有西班牙射手米捷在陣嘅史雲斯，「紅軍」又點讓得起波？一於推介2.57倍嘅「讓客」畀大家。

利物浦今季好多場波都係贏形勢輸波，上周佢哋對住西布朗就係最佳例子，主要原因係入球太過集中喺一、兩個球員身上。前線只有蘇亞雷斯一個可以孭重飛，只要「哨牙蘇」畀對手嘜實，或者狀態差少少，就會形成攻極都攻唔入嘅情況。

「紅軍」中場交唔到貨
冇錯，「紅軍」自從上月有史杜列治加盟後，「哨牙蘇」嘅重擔減輕咗唔少，但單靠前線兩件始終都係死局，講到底，問題係以謝拉特為首嘅中場線交唔足貨。事實上，睇番舒維爾、史達寧、蘇索等無疑係有潛質，可惜埋門一腳始終未夠火候，短期內都未必根治到問題。

史雲斯近13戰僅輸2場，當中不乏係面對曼聯或車路士等強隊，依然交出成績，其中喺聯賽盃4強淘汰「藍戰士」殺入決賽，更令呢支威爾斯球隊大有機會一嘗捧盃滋味。要數佢哋近期最炙手可熱嘅球員，一定係今季加盟嘅前鋒米捷，上周佢對昆士柏流浪梅開二度，喺射手榜已經進一步威脅到蘇亞雷斯同尹佩斯。家陣「白天鵝」喺聯賽榜排名第7，米捷可以話係頭號功臣。

今晚利物浦好有可能出現老鼠拉龜嘅情況，最後仲隨時畀「白天鵝」反擊得手，攞埋3分添。

紅軍遇前10球隊未贏過
‧利物浦今季對住前10球隊不勝。

‧利物浦今季主場只有3戰未能取得入球。

‧史雲斯近4場作客未贏過。

‧史雲斯連續13場作客賽事開半場細。

實半場0:0波膽
利物浦今季聯賽淨係識得欺善怕惡，一旦要應付排喺頭10位嘅對手就贏唔到，不過今仗對手史雲斯或因為英聯盃而錫身，既然兩隊都有隱憂，實難言穩勝對手。翻查紀錄，史雲斯近10場聯賽作客，當中有9次半場賽果係0:0，而且兩軍近4次交手，都有3次半場互無記錄，咁睇法「半場波膽」0:0有2.95倍，都係唔錯嘅選擇。