英總風水輪流轉 曼城炒起列斯聯
正所謂風水輪流轉，曼城今晚喺英格蘭足總盃16強主場對列斯聯，足智彩開到「-2」，「藍月亮」一樣夠力開2.02倍「讓球主勝」，掃走13年前被對方踢出局嘅烏氣。事關當年財力雄厚嘅列斯聯，近年淪落到不斷嗌賣盤，實力同士氣都有問題，靠班過氣英超球員就想爆冷，當曼城流嘅咩？

13年前踢緊英冠嘅曼城，喺足總盃遇上當時有份踢歐聯嘅列斯聯，結果「藍月亮」喺主場慘敗2:5，輸得相當羞家。不過今時唔同往日，依家嘅曼城已經係球壇燒錢最多嘅暴發戶，重遇列斯聯當然唔會再畀人恰，特別係曼城已經喺聯賽盃同歐聯出局，聯賽又爭標機會渺茫，呢場比賽關係到曼城今季有冇盃捧，試問點會唔搏先？

傳足總盃出局文帥即炒
曼城今季表現跌Watt，主要係因為士氣同軍心不穩，近期對昆士柏流浪同利物浦只能夠執1分，上星期對修咸頓衰到以1:3落敗，就連昔日列斯聯球星米斯都踩多腳，話假如曼城今場再輸，教頭文仙尼肯定即刻被叮走，但正因為外人都睇得出今場比賽有幾重要，相信文仙尼會用盡所有辦法，贏咗列斯聯至算。

列斯聯靠過氣英超兵撐場
另方面嘅列斯聯，唔夠兩個月前至話畀中東財團收購咗，仲口口聲聲話要4年內重返英超，點知最近竟然又傳出呢間老牌球會可能再換股東，認真搞笑。講真，要帶番起列斯聯絕對唔易，事關呢班波只係靠幾件過氣英超球員撐場，家陣喺英冠都只係比降班區多8分，前鋒迪奧夫同中場米高布朗惡得去邊？除非曼城班友仔真係唔想撈啦，否則今場要贏得好好睇睇至得。

列斯聯連開10口「半細」
‧曼城近9場有7次先開紀錄。

‧曼城對上4仗未試過半場領先，3次打和、1次落後。

‧列斯聯連續10場開半場細。

‧列斯聯近10場作客得2勝1和7負。

英總賽制
車路士對賓福特為第4圈重賽，若打和需加時，加時再和則互射12碼決定晉級球隊。除「車賓戰」，其餘為第5圈賽事，和波需擇日重賽。