波圖馬拉加和氣生財

歐聯16強首回合今晚繼續上演，由葡萄牙波圖主場迎戰西班牙嘅馬拉加，前者今季喺各項賽事只係輸過2場咁大把，但馬拉加亦非善男信女，其中沙維奧拿更曾効力另一支葡超勁旅賓菲加，相信能夠提供唔少情報，由於雙方實力接近，3.45倍和波值博！

馬天尼斯腳風順 借用列特臣
由莫連奴時代開始，波圖近年喺歐洲賽一直保持住唔錯嘅成績，令唔少職球員畀大球會睇中，其實波圖喺國內聯賽嘅實力更加係超晒班，就算喺歐洲賽前夕收起主力都夠贏波，無後顧之憂發揮自然得心應手。其中前鋒積臣馬天尼斯絕對有能力繼法卡奧之後，到4大聯賽闖一番事業，佢今季腳風超順，先後為波圖射入24球，當中近5場更喪入8球，數胡靠晒佢。

與此同時，佢哋喺冬季轉會窗仲成功向法林明高借用巴西老將列特臣，又從士砵亭買入俄羅斯射手伊斯米洛夫，加埋施維斯達華利拿同占士洛迪古斯又傷愈，整體火力夠晒驚人。即使中場迪科亞有傷未必踢得，點計都唔似會喺主場輸波。

門神韋利卡巴尼路上晒身
馬拉加成功喺分組賽提早晉級，令好多球迷大跌眼鏡。其實只要睇番馬拉加個陣容，祖亞昆、伊斯高、沙維奧拿等個個都係極具質素嘅球員，如果唔係受到球會財政狀況負面影響，相信呢支「西甲4哥」嘅戰鬥力一定更強。其實大家不妨留意吓門將韋利卡巴尼路，佢上周喺西甲對住畢爾包就至少救出3個必入球，最終助球隊以1:0小勝，今晚能唔能夠保持清白之身，就要睇實韋利卡巴尼路嘅表現喇！

張峰來料：波圖

馬拉加分組賽未輸過
‧波圖近10仗歐戰主場取得7勝。

‧波圖於分組賽主場3戰全勝。

‧馬拉加於分組賽1場不敗首名出線。

穩陣行先實半場0:0波膽
喺分組賽主場3戰贏晒嘅波圖，近10次歐戰主場亦拎到7勝佳績，火龍球場威力認真唔嘢小。不過今輪嚟到淘汰賽階段，對住分組賽3勝3和不敗首名出線嘅馬拉加，雙方過往都未碰過頭，預料佢哋上半場肯定穩陣行先，等摸索完對方實力同打法後，半場返入更衣室再作打算，半場波膽「0:0」有2.2倍值博。

歐聯賽制：採主客兩回合淘汰制，今輪為16強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時沒有入球，則需互射12碼決勝。

南美自由盃賽制：32支球隊分8組進行小組雙循環賽，每組首、次名躋身16強淘汰賽。