廠仔拜仁「大」激鬥
歐聯16強首回合大戰今、明兩晚繼續上演，但講到焦點當然係今晚阿仙奴主場對拜仁慕尼黑啦！兵工廠雖然今季英超表現麻麻，啱啱仲喺足總盃出局，成績同喺德甲贏晒嘅拜仁冇得比。不過以佢哋豐富嘅歐聯經驗，加埋主場之利唔係冇得揪。既然兩隊都有強勁火力，今場就玩1.75倍入球大啦！

阿仙奴左閘位穿窿
阿仙奴踏入2013年後成績回升，最大原因係一班進攻球員開始上力，同埋禾確特、基奧特同普多斯基組成嘅「鋒線三叉戟」火力驚人，其中德國前鋒普多斯基更係傳得又射得，佢今場倒戈拜仁，肯定會施展渾身解數。不過講到畀小弟最深刻印象嘅，肯定係中場韋舒亞嘅突破同創造力，為前鋒提供源源不絕入球機會。

兵工廠係就係前線幾強，不過條防線尤其係左閘位始終令人擔心！1月先加盟嘅西班牙國腳蒙利爾因為之前喺歐聯分組賽幫馬拉加出過場，今晚唔踢得，基蘭基比斯又養緊傷，巴西左閘安德里山度士仲要被外借甘美奧，就連可以客串呢個位嘅華美倫都有傷在身頂硬上，呢個「窿」隨時係阿仙奴失波死穴。

拜仁「Goal」手成籮
至於上屆歐聯亞軍拜仁，早早喺德甲帶出成條街，依家可以專心再接再厲爭歐聯。雖然今場波要作客，但佢哋手執文迪蘇傑、湯馬士梅拿、列貝利、洛賓、馬里奧高美斯同梳頓沙基利等成批高質素進攻球員，入波對佢哋嚟講真係話都冇咁易啦！既然主客雙方都有大批入球高手在陣，大家可以放心睇「大」戰啦！

筍盤：阿仙奴

拜仁今屆歐聯場場入波
‧拜仁作客6連勝。

‧拜仁今屆6場歐聯都有波入。

‧阿仙奴前鋒基奧特近6場入5球。

‧廠仔今屆歐聯主場取得2勝1負。

廠仔主場冇料捧客勝
拜仁已經18場不敗，近4場入11球兼冇失波，狀態正值巔峰。相反阿仙奴得番歐聯可爭，一旦失利球員將面對8年無冠嘅處境，壓力咁大好易影響發揮。況且佢哋今季主場鬥曼城、車路士等實力分子都輸波而回，實在令人難以睇好，不妨捧埋拜仁1.77倍客勝。