利物浦海鮮波 辛尼特「讓客」信得過

今晚歐霸盃32強次回合利物浦主場迎戰辛尼特，首回合落後0:2嘅紅軍今仗兩個新兵史杜列治同菲臘比古天奴都唔合乎上陣資格，鋒線又打回原形靠晒蘇亞雷斯，要撕破決心打穩守突擊嘅辛尼特唔易，利物浦讓波，我寧願捧2.25倍「讓客」

今季表現飄忽嘅利物浦，周日狂數史雲斯5蛋，終止5場不勝走勢，不過當日史雲斯為咗留力下星期聯賽盃決賽，收起唔少主力，紅軍贏波其實相當應分。再睇番佢哋之前成績，作客輸過畀英甲奧咸，聯賽主場都輸過畀西布朗，今鋪真係好難寄望太大。

史杜列治唔踢得
冇錯，正如佢哋守將史卡迪爾所講，紅軍今晚喺爆滿嘅晏菲路球迷打氣下，氣勢一定好，但講到要贏波反勝對手晉級，其實難度極大，事關佢哋鋒線只係淨番「哨牙蘇」一個，同佢逐漸擦出火花嘅史杜列治，因為幫車路士踢過歐洲賽所以唔出得，創造力強嘅前國米中場菲臘比古天奴又因為類似理由缺陣，就連合資格嘅意大利仔波連尼都因為肩膊甩臼，提早收咧，變相又係要靠「哨牙蘇」一個打十個。

辛尼特鋒線超班
目前辛尼特有兩球優勢喺手，如果畀佢哋偷多粒作客入球先，紅軍班人仲有冇心踢到尾都好難講。而且呢支08年歐協盃冠軍陣容唔曳，由侯克、丹尼艾維斯同基沙哥夫組成嘅鋒線已經係世界級水準，最緊要係今仗佢哋仲會有葡萄牙國腳中堅般奴艾維斯波監刑滿復出，防守力大增，要保住唔輸又有幾難吖？

首回合︰利客負0:2