史雲斯唔敢亂攻 博2.4倍半場和
巴拉福特今晚嚟到「英聯盃夢幻之旅」最後一站：溫布萊球場，同史雲斯爭冠軍！雖然巴拉福特低「天鵝」4級，但佢哋喺晉級路上接連擊敗3支英超勁旅，就證明呢班波唔會輕易扯白旗，睇埋近屆英聯盃決賽半場多數難分高低，一於撐存心死守博射12碼嘅巴拉福特換邊前不敗，博2.4倍半場和！

作為51年嚟首支踢英聯盃決賽嘅第4級聯賽球隊，巴拉福特喺過去1個月成為傳媒焦點，搶晒史雲斯鏡！不過唔好忘記史雲斯今鋪亦係一搔百年之癢，成個世紀只係第一次打入主要盃賽決賽，就算米捷同艾殊利威廉斯等主力復出，相信「天鵝」為咗穩打穩紮咁捧盃，肯定唔會話立亂搶攻，賽事早段分分鐘係悶戰一場。

巴拉福特存心死守
查實講心理質素，小妹覺得巴拉福特甚至比史雲斯更好，事關佢哋冇「勁旅」包袱，完全可以踢901齋守唔攻，球會名將卡邦尼亦呼籲「戰友」要做足120分，打甩門牙帶血吞！好多人都知，射手占士漢臣曾經喺超市兼職幫補生計、門將杜基更成功擊退癌魔，可見佢哋嘅意志比任何人都要堅定，家陣「巴仔」歷盡辛酸殺入溫布萊球場，肯定鬥心爆棚，想佢哋早早落敗？難啲囉！

冇錯，呢隊「乙組仔」喺聯賽成績麻麻，但佢哋一到聯賽盃就脫胎換骨，而且佢哋擺明車馬博射12碼，肯定會築起「血肉長城」頂住史雲斯，換邊後唔敢講，但上半場雙方都好氣好力，好難分高下，大有機會延續近6屆有4次開半和嘅走勢！

近5屆決賽戰果
年份 賽果*

2012 利物浦 1:1 卡迪夫城

2011 伯明翰 2:1 阿仙奴

2010 曼聯 2:1 阿士東維拉

2009 曼聯 0:0 熱刺

2008 熱刺 1:1 車路士

史雲斯慢熱半細穩
無論咩盃都好，既然都踢到入去決賽，通常雙方都會步步為營，唔會一開波就搶攻，加上史雲斯近排都要等到換邊後先發威，計埋盃賽，近10戰有9場都係開半場入球細，其中7場仲要係0:0波膽；對家巴拉福特鋒力不足，同樣以守行先、與史雲斯一樣係慢熱之輩，1.5倍半場細熱就係熱啲，但勝在穩陣嘛。

決賽旺開半和
‧近6屆決賽有4次開半場和。

‧巴拉福特近5戰有4鋪開半場細。

‧史雲斯近10場有9次開半場細。

決賽賽制：
英聯盃決賽於中立場舉行，若法定時間打和即加時30分鐘，若仍未能分勝負，將互射12碼決定冠軍。