碧咸擔正PSG贏馬賽添食

「萬人迷」碧咸日前首次為巴黎聖日耳門上陣，即刻交出一個間接助攻幫手打贏馬賽，喺全球約2.9億觀眾面前力證寶刀未老，今晚法國足總盃16強賽事，PSG會再喺主場迎戰馬賽，主帥安察洛堤放風腳頭甚好嘅碧咸極可能正選上陣，2.45倍「讓球主勝」要吼實。

聖日耳門近9次主場8勝
卡塔爾財團決心打造PSG成為歐洲豪門，喺碧咸加盟後的確吸引到全球目光，上場聯賽主場鬥馬賽就有超過150個國家轉播，前法國總統薩爾科齊亦有到場支持，個勢咁好當然打蛇隨棍上，今戰安排碧咸擔正做噱頭，連主帥安察洛堤都話PSG要試吓首次做國內雙冠王，又表明唔會作出大規模輪換，夾手夾腳再次砌低馬賽嚟省招牌，有望延續近9次主場8勝1和嘅強勢。

對手馬賽方面，今戰有前鋒阿休、中場班諾特捷奴、艾馬菲達奴養傷，佢哋聯賽亦僅以1分同2分壓住尼斯同聖伊天，歐聯入場券唔穩陣，未必有心爭盃仔。