強勢拜仁「客」暈賀芬咸
今晚德甲又有好戲碼，由今季勁到無倫嘅拜仁慕尼黑作客對住深陷護級危機嘅賀芬咸。拜仁家陣有成60分，賀芬咸就只得16分，唔使多講都知兩隊實力相距懸殊，加埋拜仁強勁嘅走勢，今晚作客都係大炒格，1.6倍「讓球客勝」真係抵買o架！

近期聯賽作客起碼贏2粒
老實講，拜仁今季喺德甲可謂獨領風騷，23場波只係輸過1場，唔計尋晚嘅賽事，拜仁依家足足帶甩次席嘅多蒙特17分，周中就連喺德國盃都以1:0砌低「蜜蜂兵團」，氣勢勁爆。連同各大盃賽計算，拜仁已經連續26場不敗，況且佢哋作客素來都有一手，自上年11月底開始，近5場聯賽作客都能夠淨勝對手2球或以上，而且呢5場仲要係零失球，對住賀芬咸仲有乜好驚？

再者，拜仁嘅中前場球員如湯馬士梅拿，卻奧斯同文迪蘇傑等，個個都狀態大勇，仲有洛賓同列貝利兩隻勁到不得了嘅翼鋒，賀芬咸呢場就算話有地利都唔會夠砌。

主隊呢邊，相比起喺歇冬前場場畀人大炒，近排勉強算係有所改善，歇冬後6場聯賽所輸嘅4場，全部都只係以1球飲恨。如果單計主場戰績，近3場主場更係取得勝和負各一，都算為護級減輕些少壓力。只可惜呢場對住嘅係聯賽一哥，偏偏仲有中場波蘭斯基同防線主力安達斯碧克停賽，殘陣出擊，想輸少球都難啦！

微博傳情：飛芭堤雅勁食Relax
上星期突然心血來潮，好想食生蝦飲椰青，於是「拿拿臨」買機票訂酒店，早幾日就正式出發去咗個4日3夜泰國芭堤雅之旅。呢個Trip係勁食勁Hea，每日都瞓到黃朝白晏，一日食5餐，食到瞓咗落床都仲可以攬住堆零食去食，哈哈，真係好Relax呀！