PSG華倫做「大」Show
碧咸再戰歐聯「大」舞台！法甲勁旅巴黎聖日耳門經過連串擴軍行動後，已經組織咗一支星味同實力兼備嘅隊伍，今晚歐聯16強次回合主場對華倫西亞，就算王牌前鋒伊巴謙莫域停賽，都仲有回歸歐聯嘅碧咸坐鎮。由於華倫首回合輸波在先，今晚必然盡地一煲博翻身，開1.85倍入球大話咁易啦！

伊巴謙停賽群星夠補飛
首回合作客嘅PSG一度領先2球，大好形勢下臨尾先畀華倫追番粒，最吹脹係伊巴謙莫域無端白事食紅牌，今場停賽，華倫先至叫有番一線生機。不過碧咸加盟聖日耳門經過2場波磨練後，今晚有望再戰歐聯後備登場，以佢嘅助攻威力絕對係PSG一大殺着，相信可為拿維斯等前鋒提供唔少入波機會。

不過講到聖日耳門首回合最搶鏡嗰位，始終係1月冬季轉會窗先加盟嘅巴西新星盧卡斯洛迪古斯，呢位「森巴希望」無論個人突破、腳下功夫、傳波同射門能力都係一流，個人認為佢仲高質過車路士嘅奧斯卡杜斯山度士添！PSG呢場有佢同拿維斯、柏斯托尼同碧咸在陣，火力相當驚人o架！

華倫西亞有力入波
對手華倫西亞首回合主場都輸1:2，今場去到聖日耳門王子球場狂攻係唯一出路，仲坐底要入2球先有機會出線，雖然要創造反勝奇迹未必咁易，但蘇爾達杜同莊拿斯干卡維斯呢對箭頭有一定數胡能力，要攻破聖日耳門大門唔係難事。既然兩隊都咁鍾意喪攻，今場合力炮製入球騷有幾難吖！

PSG歐聯5連勝
‧聖日耳門近10場主場取得9勝1和。

‧PSG連贏5場歐聯比賽。

‧近8場作客華倫取得6勝1和1負。

‧華倫3場歐聯作客取得2勝1負。

華倫作客強隊唔掂捧主W
聖日耳門主場氣勢驚人，足以抵銷射手伊巴謙莫域缺陣嘅影響，而且歐聯經驗豐富嘅主帥安察洛堤手中仲有拿維斯、柏斯托尼等一流戰將，足夠雙殺華倫西亞。相反華倫欠缺後防大將阿爾拉米，守力大打折扣，今仗作客又要焗住攻，實難逃一敗。呢支西班牙球隊不擅作客強隊，今季出訪巴塞、皇馬、拜仁全敗，就連對住馬拉加、貝迪斯亦輸波收場，1.78倍主勝抵玩。

歐聯賽制
今輪為16強次回合，賽事採兩回合主客制，若總比數打和，先計算作客入球優惠，再和，則在90分鐘後加時30分鐘。若加時雙方取得相同數量入波，由作客球隊獲勝，若加時沒有入球，則互射12碼決勝。

筍盤：巴黎聖日耳門
首回合：巴客勝2:1