拜仁火力稱王 省爆兵工廠

曼聯畀皇馬淘汰後，阿仙奴就係英超僅存爭歐聯嘅血脈，不過兵工廠喺16強首回合主場負拜仁1:3，莫講話爭標，今晚次回合仲有韋舒亞倦勤，作客呢支火力驚人嘅德甲班霸，反勝出線唔易，再輸鑊甘就差不多，1.83倍「讓主」值博！

阿仙奴依家排喺聯賽第5，領隊雲格已經講明最大目標係爭取重返前4，所以即使韋舒亞等球員話唔會放棄歐聯，但其實大家都心知，兵工廠作客要入拜仁3球機會微乎其微，況且佢哋條防線經常因為裝越位出事，死攻或會適得其反，令後防有更多空位畀對手施襲。

簡尼：「呢隊拜仁史上最強！」
何況，兵工廠防守力強嘅西班牙左閘蒙利爾唔合資格上陣，基蘭基比斯又未出得，左閘焗住搵華美倫或者贊堅臣客串，絕對係一大漏洞，賽前仲話韋舒亞、普多斯基同沙格拿3位前中後三線主將都因傷缺陣，根本無可能頂得住6場分組賽入15球、鋒力冠絕16強嘅拜仁。

事實上，拜仁今季氣勢之強連名將簡尼都話：「依家呢隊拜仁可能係史上最強嘅拜仁！」由此可見，德國人對佢哋評價有幾高。拜仁喺德甲贏到開巷，德國盃亦殺入4強，高層碧根鮑華揚言今季以「3冠王」為目標。就算列貝利養傷，馬里奧高美斯練波整親，洛賓亦唔知趕唔趕得切復出，以佢哋三線嘅人腳，今晚主場要贏多場、炒多鑊有幾難呀！睇嚟今晚我哋會見證自1996年後歐聯8強冇英超球隊入圍嘅景況喇！

首回合：拜客勝3:1

筍盤：

阿仙奴分組賽「客」大
‧撇除上屆歐聯決賽，拜仁16次主場鬥英格蘭球隊10勝5和1負。

‧拜仁分組賽攻入15球為16強之冠，其中12球於主場取得。

‧阿仙奴於分組賽3場作客全部開出「入球大」。

博多次「半場大」
阿仙奴首回合輸1:3，今場肯定會喪攻求創造逆轉奇迹，不過想同做係兩回事，佢哋今屆歐聯場場作客都失波，對住拜仁，玩進攻隨時重蹈首回合半場輸2粒嘅覆轍，一於博多次2.05倍「半場大」！