拜仁炒利華交差
拜仁慕尼黑上場飽食驚風散，僅憑作客入球優惠踢走阿仙奴躋身歐聯8強，賽後會長路明尼加同主帥軒歷基斯都齊齊鬧爆，今場聯賽作客利華古遜，一班戰將肯定要踢番場好波交差，撞正對家射手傑斯寧死火，一於博拜仁反底大勝一場，讓半一捧上盤。

收起4將實力仍超班
睇番德甲聯賽榜形勢，由於拜仁已經拋離多蒙特20分，提早封王已經指日可待，難怪近期一眾戰將變得輕敵大意，兩日前輸畀阿仙奴後，高層都忍唔住發火，雖然今仗話到明會收起鋒將文迪蘇傑、列貝利、湯馬士梅拿同右閘拿姆，好彩今場有中場核心舒韋恩史迪加復出，仍然有力攻陷任何對手大門。

對手利華古遜近排表現相當反覆，踢9場波只贏到2場，更連續4次主場未能保持清白身，爭奪來屆歐聯席位亮起紅燈。另外盛傳獲國際米蘭垂青嘅首席射手傑斯寧最近頹到爆，近4場只係靠12碼射入1球，並再次落選新一期德國國家隊大軍名單。既然隊波攻不銳守不穩，睇怕今場都係做拜仁嘅出氣袋。