PSG跌Watt讓唔起聖伊天

周日法甲壓軸大戰，聖伊天受讓平半必捧！歇冬後未輸過嘅聖伊天，箭頭奧巴美揚更係入球停不了，今晚主場對住連續兩場作客護級分子都輸晒嘅巴黎聖日耳門，梗係乘機搶分力爭歐聯資格，撐當頭起嘅聖伊天啦！

伊巴謙啞火連食兩場白果
聖日耳門雖然躋身歐聯8強，但上輪聯賽主場面對深陷降班漩渦嘅南錫，衰到後上險勝2:1不特止，近兩場作客鬥護級分子索察同蘭斯，竟然跌晒6分，以為PSG鍾意鋤強扶弱？咁就大錯特錯！佢哋作客鬥前列隊伍，好似排第3嘅馬賽、第5嘅尼斯，甚至喺法聯盃對聖伊天，亦未試過贏波，面對呢個「雙失」窘局，神箭伊巴謙莫域仲突然作客啞火，兩場聯賽加埋180分鐘顆粒無收，連進攻泉源都「閉塞」埋，點撐吖？

至於聖伊天就唔同啦，歇冬後9場法甲6勝3和未輸過，入波扮蜘蛛俠響晒朵嘅奧巴美揚，更加着晒火連續7場建功，最重要係佢提升埋球隊嘅進攻火力，近7場合共攻入19球，近況咁好冇理由唔撐佢哋啫！