長崎冇火吼半場和

長崎成功丸、富山勝利兩支日乙球隊，從個譯名嚟睇都勉強有贏嘅意思，咁今日雙方交鋒，究竟博邊隊好呢？1.88倍半場和應該係唔錯嘅選擇，事關佢兩隊都係打單箭頭嘅防守專家。

講開譯名，原來日本嗰邊都有人好留意足智彩啲譯名，九叔睇過有當地網民齊集日職、日乙嘅譯名笑一餐，當中富山勝利仲好些少，個隊名由意大利文Cantare發展出嚟，主要係高歌嘅意思，搭埋日文肩同法文aller，雖然含有富山方言勝利嘅含意，但係啲日本仔話直譯勝利就有啲過龍喎。不過佢哋認為最爆嘴係長崎成功丸，佢哋個隊名V.Varen個V，包含咗荷蘭文Vrede、葡萄牙文Vitoria，Varen就係荷蘭文嘅航海，夾硬叫成功丸完全係亂嚟咁話。

末開齋竟要讓富山
但係九叔又覺得冇乜所謂喎，只要唔會買錯第二隊波咪得囉，求其啦！最緊要係我哋要知道呢兩隊波係乜料。講真，長崎同富山又真係幾近似，大家都擅長踢「3-4-2-1」或者「3-6-1」陣式，同樣靠一個箭頭搵食，無疑富山班人日乙經驗好啲，長崎新升班冇耐，係就係補入高杉亮太、山口貴弘呢啲J2舊人，弊在默契未係好熟，不過足智彩開個賠率明顯偏向長崎，一隊排21名、仲未開齋嘅球隊居然可以讓第4嗰隊，睇嚟富山想勝利唔係咁易，長崎鋒力一般博佢W又有啲冒險，倒不如玩吓個半場和，希望佢兩隊45分鐘內交白卷。